أطفالنا بالشارع

السلام عليكم أصدقائي
صرلي فترة عم شوف هالمنتدى ناطرة حدا يفتح شي موضوع نقاش
بس ماحدا حكى شي
فقررت أبدأ نقاش بس رح حاول ماطول كتير بالحكي مشان نفتح باب نقاش
ولو أنو ما حدا عم يفتح المنتدى الا بالنادر(طبعا مابقصد ميجو شكرا الك منور دايما ميجو )
بس عأمل أنو حدا يشوفو قريبا ونتناقش
طبعا والكل معذورين لأنو بعرف انو فترة ضغط ودراسة
بس اشتقتلكن
المهم :
من المواقف الي كتير مؤلمة ..
لما بتكون ماشي بالشارع وبتشوف طفل صغير واقف بالشارع
إما عم ينتظر يجي حدا يعطي شي ,,او يحاكي شي..او عم يستنى الشارع يفضى مشان ينام عالرصيف
او بشي حارة..
لما بتطلع بهيك طفل كتير بحس بألم وفكرة بتاخدني وفكرة بتجيبني ..
الناس رايحة وجاية ..ناس بتطلع فيه وبتدير وجا.. ناس بتقرف منو .. ناس بتبعد عنو مو عاجبن ..وناس بتتذمر من وجودو
..وناس بتخاف يسرقا ..وناس وناس ..
بدون مايفكرو انو هاد "طفل " مارح ياكلن ومو ذنبو انو ظروف الزمن وصلتو لخون
طب يا بني آدمين هاد الطفل شو ذنبو ؟؟
مالو طفل ببراءة كل الأطفال؟؟
أولاً وأخيراً هاد طفل متلو متل ابنكم
بس انتو ابنكن الله أكرمو بأهل قادرين يعيشوا صح
اما هوة اما بيكون يتيم ومتروك أو بيكونوا اهلو موعارفين كيف يعيشوا وكيف يعَيشوا بالبيت ..
طبعا في حال كان عندن بيت ..أو بيكون مالو مكان بالعيلة لضيق حالن فالمسؤولين عنو بيتركوا للشارع..
ياالله عنجد لما بشوف هيك طفل "وما أكثرهم"
بقول ياربي طب انا شوفيني أعمل ؟؟
شو فيني ساويلو؟؟
ممكن حاكيه؟؟أعطيه يلي بدو ؟؟
بس هاد طفل من 100 ؟؟
طب هدول مو عايشين معنا؟؟
معقول ولادنا عايشين ومتهنين وفي ولد مو عرفان طعم السعادة ولا الطفولة؟؟
من فترة دانا كانت منزلة بالفيس قصى صارت معا بعنوان طفل على الرصيف..
قصة كتير مؤثرة ومؤلمة ولو ماكانت دانا مغمورة بالانسانية ماكانت بتحكي وبتتأثر وبتأثر فينا ..
بس مو الهدف اننا نتأثر بالقراءة وبعدين ننسى ونترك الموضوع
صار معي موقف كتير بحتقر حالي عليه ..
من فترة كنت ماشية مع رفيقتي ..أجى طفل ..بدو يعطيني شي ..بتوقع سورة يس ..
أنا بصراحة مابعرف شو أعمل بهيك موقف ..
وقتا مارديت لأنو ماعرفت شو بدي رد..كنت عم فكر بطريقة رد فيها بس هوة مشي لأنو مارح يستناني !!!
..ومن وقتا حاسة الموقف متل السكين بقلبي ..
انو كسرت بخاطرو ومارديت ..معقول ؟؟ عنجد لايمكن سامح حالي عهالموقف ..ولا يمكن انسى كيف رديتو للطفل ...
بس عنجد انا ماكان بعرف شو اعمل ..انا لما بعطيه شي بكون عم شجعو عهالشي ..
ولما مابعطيه بيروح بيطلب من غيري ..
وبينكسر مرة ومرتين وتلاتة ..ان كان بسببي او بسبب غيري
طب هاد طفل .. عندو حياة وعندو طفولة ..وعندو مستقبل..
مكانو مو هون..
حرام والله حرام علينا نتركن هيك..
هي غير انو غالبا رح يكبر غالبا يصير حرامي ..او يشتغل مع شي عصابة أو يلجأ للخطأ مشان يعيش..
او في كتير حالات عم اسمعها بيروح بينتحر !!!!!!!
فعلا الواحد لما بيسمع مجرد سمع هالحكي بيحس انجرحت انسانيتو
طيب كيف لما نشوف بعينا ونسكت؟؟؟
وهلأ رح أكتفي بيلي حكيتو
وافتح باب النقاش..
برأيكن كيف فينا نعالج هالمشلكة؟؟
كيف ممكن نتعامل معن ؟؟
كيف فينا نحمي طفولتن ؟؟
نساعدن بمستقبلن؟؟
نحمي مشاعرن ..وخاطرن ؟؟
مكانن بالشارع؟؟
فينا نعمل شي هلأ مشانن؟؟
كلنا عايشين نفس المشكلة ..
وبالفعل مشكلة انسانية ..كتير مؤلمة ,,
خلونا نتناقش فيا ..اذا بتحبوا

أولا بشكرك للوش على فتح هاد الموضوع ...

لأنو فعلا موضوع هام جدا ... لأنها ظاهرة انتشرت كتير .. بالآونة الآخيرة

وسببها طبعا الفقر .. أو بيكونو أيتام ومالن حدا .. أو أهلن عندن بطالة فبيبعتو هالولاد ليترزقو ..

الحل طبعا .. الناس تشغل ضميرها .. وتدفع زكاة أموالها لهيك نوع من الناس ..
اختي مو شرط زكاة... صدقة بتكفي ..
يعني لو تكفل انسان قادر يدفع بطفل ولو بأقل المبالغ ... ولو بسيط .. بيغنيه عن وقوف الشارع والتسول .. والتذلل ..

ولازم تتشكل جمعيات .. لهالأطفال .. يعني مساكن وإعالة .. يعني صندوق عكل باب مسجد أو دائرة حكومية نفس السعودية .. كتير بيفيد وبيدعم

قدما كان .. بس حنحسن ونخفف من هالظاهرة ..

وأقل شي ندعي لهالأطفال .. وللفقراء .. والله يفرج عن جميع الأمة

بشكرك كتير للوش ..
تحياتي

و أخيييييييييييييييييييييرا حدا فتح نقاش . كنت خايفة نزل شي وضل عم احكي مع حالي وبالصراحة اكتر كنت حابة اسمع طرح حدا غيري لهيك مواضيع
المهم انو عندي رد طويل عريض بس اعذروني صعب اكتب هلأ لان ماعنا انترنت . قريبا جدا رح بعلق

بس تعليق بسيط انو الطفل يلي مارديتي عليه . موقف بيصير مع كتير ناس ومرة صار لما كنا انا واياكي ووقتا انا مارديت
مو دايما بيكون فينا نعمل شي . بالموقف الي عم بذكرو وكنا سوا وماردينا . لو لاحظتي مين يلي واقف عم يطلع عالطفل ومين واقف لبعد عشر امتار . لهيك استقطعت الموقف بانو نوقف نتصور . لو ردينا عليه ماكنا ساعدناه ابدا ولا كان ردنا رح يفيد و اذا لاحظتي مو بس ماتصرفت حيالو حتى اني مشيت و كأني مو شايفتو . مو دائما فينا نتصرف بنفس الموقف بس دائما فينا ناخد فكرة متكاملة اكتر لحتى يصير تصرفنا اصح في الحالات يلي فينا نتصرف فيا

انا شخصيا ومابعرف اذا. حدا عندو نفس النظرة مابحب اتصرف بما يجب و بس يعني بالنسبة الي مو هي قضية متسول واني اجبر بخاطرو . هي قضية اوسع وبدا حل اشمل وادق و مدروس الى حد ما

بكل الاحوال لي عودة ان شاء الله
دمتم أناسا

[quote="dana shubat"]و أخيييييييييييييييييييييرا حدا فتح نقاش .


كنت خايفة نزل شي وضل عم احكي مع حالي
ولو دندوش لا بالعكس اذا بتنزلي اي موضوع كلنا منتناقش معك ...

وبالصراحة اكتر كنت حابة اسمع طرح حدا غيري لهيك مواضيع
حلو كتير ..هوة مجرد انك جسيتي نبض وعملتي المنتدى الفرعي هاد ..فهاد كتير تصرف حلو منك (اذا ماكنت غلطانة بس أظن فكرتك هالمنتدى)

المهم انو عندي رد طويل عريض بس اعذروني صعب اكتب هلأ لان ماعنا انترنت . قريبا جدا رح بعلق
اوك مافي مشكلة دندوش ..بانتظار تعليقك ..بصراحة دايما بهيك مواضيع بنتظر تعليقك قبل الكل فبانتظارك

بس تعليق بسيط انو الطفل يلي مارديتي عليه . موقف بيصير مع كتير ناس ومرة صار لما كنا انا واياكي ووقتا انا مارديت
ممممم بس مابعرف هل هو تصرف صح انو نحنا مانرد؟؟يعني تجاهلنا ..حسسناه انو هوة غير موجود ..!! كتير تصرف بيئهر ..هوة الموقف الي بقصدو معك ..نفسو لما كنا سوا
مو دايما بيكون فينا نعمل شي . بالموقف الي عم بذكرو وكنا سوا وماردينا . لو لاحظتي مين يلي واقف عم يطلع عالطفل ومين واقف لبعد عشر امتار .
اها .. صح كنا سوا ..مانتبهت ..لأ .. كتير تلبكت وقتا انو مارديت عليه ومانتبهت عحدا تاني
لهيك استقطعت الموقف بانو نوقف نتصور . لو ردينا عليه ماكنا ساعدناه ابدا ولا كان ردنا رح يفيد و اذا لاحظتي مو بس ماتصرفت حيالو حتى اني مشيت و كأني مو شايفتو .
اها ايوا ...معناها شكرا عالتوضيح
مو دائما فينا نتصرف بنفس الموقف بس دائما فينا ناخد فكرة متكاملة اكتر لحتى يصير تصرفنا اصح في الحالات يلي فينا نتصرف فيا
صحيح ..كلام رائع..شكرا دندوش

انا شخصيا ومابعرف اذا. حدا عندو نفس النظرة مابحب اتصرف بما يجب و بس يعني بالنسبة الي مو هي قضية متسول واني اجبر بخاطرو . هي قضية اوسع وبدا حل اشمل وادق و مدروس الى حد ما
لا لا طبعا مو قصة انو كسرت بخاطرو او جبرت بخاطرو بالعكس انا طارحة الفكرة لناقش كيف فينا نحنا بعمرنا وموقعنا كيف ممكن نلاقي حل عملي..ملموس ..مايكون مجرد حبر عورق او حروف عالنت او افكار غير مترسخة ..
بالعكس بدي أعرف انو كيف فينا نحل هالقصة بالواقع ..لأنو كتير مشكلة مؤلمة ومو طبيعي سكوت الناس عنها ..
بس طبعا ذكرت الجانب الي متل ماوصفتي "التصرف بما يجب" من باب انو هاد اقل شي ممكن يخطر عبالنا وقت نشوف طفل بالطريق ..

بكل الاحوال لي عودة ان شاء الله
ان شاء الله بانتظار عودتك
مشكورة كتير دانا عمرورك وأفكارك الي كنت بانتظارا ..

دمتم أناسا
ودمتِ فراشة الانسانية "لاحظت انو في ناس هيك مسمينك " [/quote]

ممممم بس مابعرف هل هو تصرف صح انو نحنا مانرد؟؟يعني تجاهلنا ..حسسناه انو هوة غير موجود ..!! كتير تصرف بيئهر ..هوة الموقف الي بقصدو معك ..نفسو لما كنا سوا
هلا هو مو تصرف صحيح دوماً ، انا بقلك لو انو طفل عادي يعني ابن جيرانكن او حدا ماشي مع اهلو وعايش حقوقه الطفولية بقى لا مابيصير نتجاهلو او خلينا بالتخفيف نقول مابيصير مانرد
نحنا ماحسسناه انو هو غير موجود ، نحنا قلنالو بتصرفنا انو مو كل شي بدك ياه وهو غلط بتحصل عليه
يعني لبيبة كتير صعب على مدار النهار تشوفي حوالي ال20 وتعطي كل حدا 5 ليرات ؟! يعني 100 ليرة بالنهار اديش ممكن تأثر ؟!!
لا مو صعب بس الفكرة انو هاد الطفل يلي نازل وهو بيعرف انو اليوم بدو يمر 100 شخص وكل حدا بدو يعطيه 5 اذا انا وحدة من هالمية وصارو اليوم 99 وبكرا بيصيرو 98 وهكذا رح يوصل لمرحلة يعرف انو هالطريقة غير مضمونة وغير محققة دوماً وانو مو هاد الشي الصح
طبعا بحكيي انا مابلوم الطفل لان سبق وكان في نقاش وذكرت رأيي انو اذا نحنا مابنعطي الطفل بقى هاد الطفل ممكن يتعرض لضرب او لكسر نفس او او او ......... باعتبار هو مُرسَل لهدف معين وهو جمع المبلغ المعين في الساعات المعينة
بقى انطلاقاً من مبدأي باني لما اتصرف بدي تصرفي يكون "محدثاً لفرق" بدي تصرفي يكون غير ، بقى انا مارح يكون وحدة من هال100 يلي نظرتهم العاطفية سطحية تقتضي بانو لما يطلب هالطفل انا رد عليه ومابخسر يلي عطيتو ياه او كما يقول البعض "حسنة ودفع بلا"
بس حقيقة انا ممكن تصرفي يكون اسوأ ويعمل ويزيد وضعو سوء مو العكس
شو مشان لو كان ال 100 شخص مروا ؟!
وقتا بكون انا ال 101 ............. أهاااااااااااااااااااااا معناها بكرا بيصيرو 102 معناها ياولد خليك هون شوي شوي بيزيدو وبتكتر الغلّة
طبعا خطابي ليس للطفل بحد ذاته
النقطة التانية انو في حال كنت موافقتيني بموضوع انو اعطيه شي او لأ
نفسياً ... انو هو انكسر او لأ
طيب لو حاكيتيه شو كانت احتمالية انو ماينكسر ؟
لاحظي انو انا لما تصرفت لم اكسر قاعدة انسانية ولا قاعدة شرعية
"فاما السائل فلا تنهر" ونحنا مانهرناه
كنا بوضع كان من سابع المستحيلات انو نوقف معو ولو لمدة 5 دقائق وتحاكيه وذكرت سابقا انو لو انتبهت مين كان واقف وراه ومين كان واقف على بعد 10 امتار ولو لاحظت طلبي الغريب بانو ناخد صورة وسط هالعجقة كان اختلف رأيك وتعليقك
الفكرة يلي بدي وضحا انو كل موقف الو تصرفو
بس يعني انا عندي كل هالافكار وكنت جدا واثقة من تصرفي ، مازال عندك رأي مختلف طب ليه ماتصرفت ؟؟؟؟؟

[color=orange][بس طبعا ذكرت الجانب الي متل ماوصفتي "التصرف بما يجب" من باب انو هاد اقل شي ممكن يخطر عبالنا وقت نشوف طفل بالطريق ../color]
[color=green][هاد التصرف يلي انا بوصفو بالعاطفي السطحي
انو نحنا حقيقة عم نرضي انسانيتنا ماعم نحل مشكلة
يعني بس كرمال انا مااتأثر اني شفت طفل هيك وماتصرفت ببقى لااااا بعمل "اي شي" احسن من "بلا"
برايي هاد قمة الخطأ
وفيو خصلة انانية
مو لمجرد انا تأثرت بوضع طفل انا اسارع بالتصرف"بما يجب" لأ ... القضية بدا منطق لنلاقيلا حل
اصلا ماخلى القصة تتفاقم غير هالتصرفات السطحية يلي عم تعطي امل للشبكات وللآباء اللاأبويين انو يلا انتو وسعو ونحنا بندفع
/color]


النقطة الاخرى بالمجال التاني تقتضي بانو الاباء كمان غير ملومين بشكل كامل يعني في ظروف وفي حاجات معينة
طبعا انا ماعم اعطي مسوغات ولا عم اطرح اعذار بس كمان خلينا شوي مانقسى عالأب او عالأم وخلينا نفكر انو هنن كمان بحاجة لمساعدة ، واذا ساعدناهم نحنا بنكون عم نساعد الاطفال

بعتقد هالفكرة بتعرفيا عني بتقتضي انو " اذا بدي حل مشكلة لازم حلا من اصلا
يعني انا اذا اقنعت طفل بسوء التشرد واهلو مااقتنعو .......... شو استفدت ؟؟؟!!
انا وانت وهو وهي وكل حدا صعب كتير يكسر كلمة اهلو وهي نحنا المعززين طب كيف هنن ؟
والا بنكون نحنا عم نزود الموضوع بالاتجاه السلبي يعني هالطفل رح بيتمرد ع اهلو ممكن يترك البيت ممكن يحلل قتلن وممكن كتير اشياء تانية
لذلك حتى كلامنا واقناعنا لازم يكون مدروس ولازم نراعي فيه كل الاطراف الموجودين ضمن القضية
انا ماعم احكي هالحكي لكل الناس يلي بيمشو بالشارع وبيشوفو المشردين
انا عم احكي ليلي حابب يكون معنا بالحل وبانهاء هالمشكلة

بعرف اني استمر في التاجيل بس حابة اطرح الحل بطريقتي بشكل منسق لهيك ببقى بحطو ان شاء الله
كرمال مايكون مجرد افكار متناثرة
اعذروني عالطولة

اهلا وسهلا دندوش مرة تانية

اقتباس :

هلا هو مو تصرف صحيح دوماً ، انا بقلك لو انو طفل عادي يعني ابن جيرانكن او حدا ماشي مع اهلو وعايش حقوقه الطفولية بقى لا مابيصير نتجاهلو او خلينا بالتخفيف نقول مابيصير مانرد
نحنا ماحسسناه انو هو غير موجود ، نحنا قلنالو بتصرفنا انو مو كل شي بدك ياه وهو غلط بتحصل عليه
يعني لبيبة كتير صعب على مدار النهار تشوفي حوالي ال20 وتعطي كل حدا 5 ليرات ؟! يعني 100 ليرة بالنهار اديش ممكن تأثر ؟!!
لا مو صعب بس الفكرة انو هاد الطفل يلي نازل وهو بيعرف انو اليوم بدو يمر 100 شخص وكل حدا بدو يعطيه 5 اذا انا وحدة من هالمية وصارو اليوم 99 وبكرا بيصيرو 98 وهكذا رح يوصل لمرحلة يعرف انو هالطريقة غير مضمونة وغير محققة دوماً وانو مو هاد الشي الصح
طبعا بحكيي انا مابلوم الطفل لان سبق وكان في نقاش وذكرت رأيي انو اذا نحنا مابنعطي الطفل بقى هاد الطفل ممكن يتعرض لضرب او لكسر نفس او او او ......... باعتبار هو مُرسَل لهدف معين وهو جمع المبلغ المعين في الساعات المعينة
بقى انطلاقاً من مبدأي باني لما اتصرف بدي تصرفي يكون "محدثاً لفرق" بدي تصرفي يكون غير ، بقى انا مارح يكون وحدة من هال100 يلي نظرتهم العاطفية سطحية تقتضي بانو لما يطلب هالطفل انا رد عليه ومابخسر يلي عطيتو ياه او كما يقول البعض "حسنة ودفع بلا"
بس حقيقة انا ممكن تصرفي يكون اسوأ ويعمل ويزيد وضعو سوء مو العكس
شو مشان لو كان ال 100 شخص مروا ؟!
وقتا بكون انا ال 101 ............. أهاااااااااااااااااااااا معناها بكرا بيصيرو 102 معناها ياولد خليك هون شوي شوي بيزيدو وبتكتر الغلّة
طبعا خطابي ليس للطفل بحد ذاته
النقطة التانية انو في حال كنت موافقتيني بموضوع انو اعطيه شي او لأ
نفسياً ... انو هو انكسر او لأ
طيب لو حاكيتيه شو كانت احتمالية انو ماينكسر ؟
لاحظي انو انا لما تصرفت لم اكسر قاعدة انسانية ولا قاعدة شرعية
"فاما السائل فلا تنهر" ونحنا مانهرناه
كنا بوضع كان من سابع المستحيلات انو نوقف معو ولو لمدة 5 دقائق وتحاكيه وذكرت سابقا انو لو انتبهت مين كان واقف وراه ومين كان واقف على بعد 10 امتار ولو لاحظت طلبي الغريب بانو ناخد صورة وسط هالعجقة كان اختلف رأيك وتعليقك
الفكرة يلي بدي وضحا انو كل موقف الو تصرفو
بس يعني انا عندي كل هالافكار وكنت جدا واثقة من تصرفي ، مازال عندك رأي مختلف طب ليه ماتصرفت ؟؟؟؟؟

طيب تمام انا معك بهالحكي كلو ..دانا مو الفكرة أنو نحنا ما نكسرو بأنو نعطيه 5 او نعطيه طلبو ..او نحكي معو ..الفكرة انو هاد طفل حرام يكون بهالوضع ..ونحنا شوفينا نعمل لحتى مانكسرن وما نزيد الغلط ونعالجو بغلط..كيف فينا نعالج الموقف بطريقة صح ..كيف فينا ننهي هالمشكلة ونحنا واقفين هون بعمري وعمرك وموقعي وموقعك وموقع كل شخص بدو يغير هالشي..
الفكرة مو بأنو نعطين نهائيا ..الفكرة شو الحل الصحيح ..يلي منحفظ فيه مشاعرن .. ومننهي هالموضوع الخطأ ..من أصلو..
كلامك كلو صح ويسلمو إيديكي وانا معك بهالحكي مية بالمية....
سبق وقلت دندوش انو انا ماعرفت كيف أتصرف ..وماعرفت شو التصرف الصح ..ولا عم أعرف كيف أتصرف صح وبرأيي أغلب الناس متلي ..يعني إما بيعطوا أو بيهملوا وجودو والتنين مو الحل ..
لهيك فكرت أنو نتناقش لنوصل لشوف شو رأيكن وشو عندكن أفكار لنتعامل مع الوضع صح..
يعني والله هدول أطفال .. لازم نعمل المستحيل مشانن ومشان ماتنقتل طفولتن ..

اقتباس :

هاد التصرف يلي انا بوصفو بالعاطفي السطحي
انو نحنا حقيقة عم نرضي انسانيتنا ماعم نحل مشكلة
يعني بس كرمال انا مااتأثر اني شفت طفل هيك وماتصرفت ببقى لااااا بعمل "اي شي" احسن من "بلا"
برايي هاد قمة الخطأ
وفيو خصلة انانية
مو لمجرد انا تأثرت بوضع طفل انا اسارع بالتصرف"بما يجب" لأ ... القضية بدا منطق لنلاقيلا حل
اصلا ماخلى القصة تتفاقم غير هالتصرفات السطحية يلي عم تعطي امل للشبكات وللآباء اللاأبويين انو يلا انتو وسعو ونحنا بندفع

لا لا دانا مو قصة نرضي إنسانيتنا ..القصة أنو تحطي حالك مكان هالطفل
انا مابقبل أنو انسان يحس بالغلط او بالجرح سواء مني او من غيري
وكتير عم حاول لاقي حل لأي مشكلة قد تجرح إنسان ..مو لأنو بدي أرضي إنسانيتي
بس لأنو مابهون علي ينجرحو ..او ينئذو ..
أنا اصلا مابقبل هالأمور عحالي او بستصعب أنو يصير جزء منها علي
فمعقول نقبلها لغيرنا؟؟
لأ انا مابعتبرا أنانية ..لأنو نحنا ماعم نعمل هالشي مشانا ..عم نعملو مشانن هنن..لأنو مابدنا هنن يحسوا بإحساس سيء
..
قلتلك انا ضد انو نعطيهن وضد أنو نتركهن بحالهن ..
عم احكي لنلاقي حل حقيقي .. صحيح ..للموضوع مو نمشي بأنو خلص اوك ..هيك منيح ..هيك بيكونوا راضيين ..منيح
بس نحنا مالقينا حل..
يعني اعتباريا..متل الي بياخد مخدر أو دوا لينسى وجعو ساعة وبيرجع الوجع بعدا
هي غير اننا عالجنا الغلط بغلط ..

اقتباس :

لنقطة الاخرى بالمجال التاني تقتضي بانو الاباء كمان غير ملومين بشكل كامل يعني في ظروف وفي حاجات معينة
طبعا انا ماعم اعطي مسوغات ولا عم اطرح اعذار بس كمان خلينا شوي مانقسى عالأب او عالأم وخلينا نفكر انو هنن كمان بحاجة لمساعدة ، واذا ساعدناهم نحنا بنكون عم نساعد الاطفال

بعتقد هالفكرة بتعرفيا عني بتقتضي انو " اذا بدي حل مشكلة لازم حلا من اصلا
يعني انا اذا اقنعت طفل بسوء التشرد واهلو مااقتنعو .......... شو استفدت ؟؟؟!!
انا وانت وهو وهي وكل حدا صعب كتير يكسر كلمة اهلو وهي نحنا المعززين طب كيف هنن ؟
والا بنكون نحنا عم نزود الموضوع بالاتجاه السلبي يعني هالطفل رح بيتمرد ع اهلو ممكن يترك البيت ممكن يحلل قتلن وممكن كتير اشياء تانية
لذلك حتى كلامنا واقناعنا لازم يكون مدروس ولازم نراعي فيه كل الاطراف الموجودين ضمن القضية
انا ماعم احكي هالحكي لكل الناس يلي بيمشو بالشارع وبيشوفو المشردين
انا عم احكي ليلي حابب يكون معنا بالحل وبانهاء هالمشكلة

تمام هالحكي ..كمان انا مابلوم الأهل .. لأنو في ظروف وفي أمور كتير خلتن يوصلو لهالمرحلة..
الخطا أولا واخيرا هوة عادات ووضع مجتمع ..
تماما انا معك بهالحكي حلو كتير .. طيب كيف فينا نوصل لأهلن ونقنعن انو في حل غير هيك لانو هيك غلط
والأهم من هيك كيف فينا نأملن طريقة وأسلوب يساعدن عأنن مايفكرو يحطوا ولادن بهالوضع..
صحيح كلامك كتير مهم ينعرض وينحكى ..
حلو هالحكي ..
وهلأ نحنا لازم نفكر بحل من موضعنا ..
يعني اا القادرين عتغيير هالشي ببساطة مابدن يغيرو
نحنا شو ممكن نساوي لنغير هالشي..؟؟


بتمنى تكون وصلت فكرتي وفهمت كلامك صح
شكرا دندوش عكلامك ونقاشك الرائع كالعادة..
وبتمنى نلاقي حل جذري حقيقي لهالمشكلة ..

dana shubat كتب:

بعرف اني استمر في التاجيل بس حابة اطرح الحل بطريقتي بشكل منسق لهيك ببقى بحطو ان شاء الله
كرمال مايكون مجرد افكار متناثرة
اعذروني عالطولة

لا لا عادي دندوش خدي وقتك..
حلو كتير طالما عم تقولي عندك طرح لحل ^^
خدي وقتك كلووووووو
واد مابدك
بس انو يستمر التفكير بحل ..ويصير حل ملموس بأقرب وقت مايضل افكار
وانا واثقة انو هنلاقي جواب مثالي عندك..
شكرا كتير
خدي وقتك..
بانتظارك دندوش.