قاموس شامي - عربي

قاموس:شامي - عربي

دَشْرو : يعني حل عنّو .. تركو

ماني غضران : يعني لست بقادر وهي( بالميداني)

يوه تشكلو آسي : يوه مفرده يأتي شرحها لاحقاَ

تشكلو آسي بعيد( الشر) تعبير يفيد شدة حب المتكلم للمتكلم عنه . .

الواه الواه : تعبير نسائي بحت يفيد التمسخر على شيء ما

معبّا بـ بنطرون : يعني واحد أجدب وجاية يحكي

ولا : آداة تستخدم في النهر والشتم

وخنان : مسبة مانها ظريفة بس وضعت للضرورة اللغوية

دشّرني : أي حل عني . . . وحل عني يعني اتركني بحالي

طلاع من راسي : كمان يعني حل عنّي

سد بوزك : يعني سكوت

سد نيعك : شرحو

أيدي بزنّارك : تعبير يستخدم للتعبير عن الرجاء

دخيل الله : أيضاَ تعبير والمقصود به هو الاستغاثة بالله

شَعرو متل الشوشة : أي أن شعره منفوش ومنكوش

متل فرشاية المدفع : يعني شعراتو خشنين ومنكوشين

وضرّاب السخن : وهي مسبّة. . وتعني . . . . ما بعرف بالضبط شو .. بس
مسبّة

يوه الواه الواه : مفردة شهيرة جدأ عند النساء وتفيد الأوّية ( نوع من أنواع المسخره بين النساء)

كوكِش : يعني يفتش

بحبش : أيضاً مفردة تعني البحث مع التمحيص

ينمحئ : ويعني ينضرب على قامتو . . يسطفل

يبعتلو حمّى : أي تصيبه حمى ونخلوص منّو

يبعتلو أتلو : يعني يموت

يروح دعس : كمان يعني يموت بس دعس (دعس . فعس. معس )

متل مكّوك الحايك : يعني بحوص كتير

يفش نيعك : هي مسبّه

برِي عليك : يعني برافو أحسنت

شو مشان : يعني شو

تؤبرني : دليل محبّه

تشكل آسي : كمان محبّه

تؤبر عضامي : نفس المعنى بغير ريحه

تمشي على رمشي : شرحو

تطلع على أبري : كذلك

زواز : يعني زواج

سجره (بالسّين ): يعني شجره

أوضه : يعني غرفه

يتحورء : متل يبعتلو حمى

يتئوّص : بنفس المعنى

يتأمّع : كمان هيك شي

عود يئعد رزّك : يعني خيلتنا حاجة تحوص

والمعنى الأدق: يقعد رزك يعني تموت والناس ياكلو رز. . لأنو من المعروف عندما يموت حدى بتصير عزيمة وبيطعمو الناس أوزي على روح الميت والأوزي أكلة معروفة بالشام

وين غاطط : وين مو مبين

مافي أرنة: يعني لا يوجد مكان

مطرح مالو آعد : يعني بالمكان يلي يجلس فيه

والسبع تنعام : يعني إلنا الشرف

وأش كان : وتعني .. وأذا كان ..

بر كتان : يعني ممكن .. ليه لأ

ششمه : يعني تواليت (( بيت الماء ))

كبيّنه : شرحه

بدي طئّش : أريد الذهاب إلى دورة المياه

خالص : يعني منتهي أمرو ... حرام عيشتو

حمل ضرب طْرِيئو : يعني يحمل حالو وراح

الداكونه : الغرفه يلي تحت الدرج

نمليّه : مكان بالمطبخ بيحطو فيه اغراض

صحن مئوبع : يعني صحن منتلي لآخرو

حيط بياخذو وحيط بيجيو : تقال للي بيسكر من كتر الترنّح

مابيعرف الخمسة من الطمسه : عن الرجل اللي ماعندو ثقافة

سرّي مرّي : عاللي بيخفق برات البيت

شندي بندي : للي بيحكي بلا طعمه شروي غروي

فايت بالحيط – طاقق الفيوز : للدلالة على انو ماعم يلاقي كلمة مناسبة

مجنّط : مفلس ولا قرش

كِحته : إيدو ماسكه . بخيل

شاطط ماطط : يعني مدلع زيادة

نعيان : يعني قلبو بارد

نايط = نعيان = بارد

شاضومه : بنت مجلوئة . . يعني كيف بدي إلكن . . . قليلة أدب ومصبْينه

شحّاطة : مايلبسه المرء في قدمه عندما يكون في المنزل

صرمايه : يعني حذاء

ديوانيّه : يعني صوفايه

صوفايه : يعني كنبايه

طائيّه : القبّعه التي توضع على الرأس

تعسيله : نومة بعض الظهر

تغدّى وتمدّى : يعني قيلوله بعد الغداء

مسرسبة : يعني بتحب النظافة كتير

مسمّاويه : يعني حقودة وأويّه

كركمّه : يعني ختياره مصوفنه

أسسييع..... أوعى الزيت : بمعنى أفسح طريق

زكرت : يعني أبضاي

أغّيييييى : هي للأبضايات وبس

خروء : يعني ضعيف كتير ما بيلئى كف

تاكلو الدوده العميا : يعني الواحد يموت وياكله الدود بعيد الشر

يبعتلو أتلو شو سمج : كمان يعني يموت وسمج يعني غليظ .

موَسوس : مهووس بشغله

محبّك : يعني زكي كتير

ضراع : يعني ذراع

المحروسه : كلمه تسبق اسم أحد في حال السؤال عنه مثلا : (كيفا المحروسه والدتك ..) وهي تذكر على النساء فقط

عئلو جوزتين بخرج : يعني عقله صغير

متل الأطرش بالزفّة : يعني مالو علاقة بالموضوع

حاجه تحوص وتلوص : يعني حاجة تفتل وتدور

شويّة لخار : بعد شوي .. وقت آخر

بنت عمّي : يعني مرتو وطبعاً بالعكس

تخورّف : إتخوزء

مع ملاحظة أن حرف القاف يقرء همزه وليس قاف

مثلاً : (ينمحق = بنمحئ )

وهذه كلمات متداولة فقط عند أهل الشام الأصليين

لك انا شامية بس والله اكتر من تلات ارباعن لهالكلمات موسمعانة فين
والاقل من الربع يلي بعرفو بعرفه بس ما بعرف شويعني Embarassed

شكرا الحمدلله صرت اعرف كم كلمة شامية Embarassed

شكرا اعاالموضوع
تقبل مروري
بس سؤال اذ حدا بيعرف "هلأ انا بقول انو انا من الشام يعني شامية:هل شامية؟؟كلمة موحلوة او تعني مسبة؟"

لك أنا شامي
كمان
بس مو هيك القصة يا حجة ليلو

هيك في حكين نكشات يعني

وأنا مو سمعانن بس هلأ اتعلمتن

منورة ليلو

مجد الرياضيات كتب:: لك أنا شامي
كمان
بس مو هيك القصة يا حجة ليلو

هيك في حكين نكشات يعني

وأنا مو سمعانن بس هلأ اتعلمتن

منورة ليلو

والله هالشوام كل يوم بيطالعو قاموس كلمات جديد
يعني انا كتير بستغرب لما بحكي مع شوام
وعفكرة اهلي كلن لهجتن شامية
بس انا موهيك يعني كلو بيقلي انو انا شامية بالورق بس
مابعرف هالشي صح او غلط بس هوة صح برأيي لأنو هالشي
خلاني انا ودندوشتي اقرب لبعض "تؤبش قلبي دندوشتي شو مشتقتلا :pale: :pale: Sad

"
مشكور كتير يامجود
النور نورك

شو هالكلمات هيدول صحيح نحنا شوام بس مامنلفظ ولا حرف منن
يسلمو ايديك مجد
في عندي معجم شامي رح حطلكن , يمكن يكون في كلمات منعادة بس معليه شوفوهن
زيادة الخير خيرين

كركمة = كركوبة : امرأة كبيرة في السن
مطرمخة : كسولة
شرنة : لا تعتني بالنظافة
يملط : يستسيغ الطعام و يطيل في مضغه
انقرق : انزعج
حلّي سنونك = سمسمية : حلوى
آللش : اعتاد على الأمر
شرشحة : عكس مرتب
مسطوم : مسدود
مجعلكة = ملعبجة = مكرشنة
كمشة : حفنة
كوشة : مجموعة
مشبصة : متعبة
تخبيص : أخطاء متكررة
كرفتة : بشكل متتالي
خلنج : لم يستعمل
أيمع : بوظة
ألط : نظف بسرعة و بشكل عام
مبعوج
كربوج : مهضوم .. جميل
حربوء : يتدبر أموره بنفسه
خروء = تشتوش : لا يستطيع فعل شيء
محشوم : بعيد عن الشبهات
نشوءة : اصدار صوت عند البكاء
مزعبر
مبروء : ملئوط
ملووء
مدحوش = محشوك
يتناوء : ينظر خلسة
عفش : غير نظيف
مرحرحة : واسعة
فرتوك : صغير
منخار : أنف
أرابيز
شاطة ريالته
شيبة : امرأة مجنونة
ملبوش : اقحم بأمر لم يكن بالحسبان
و اللعية : تقال لمن يثرثر كثيراً
عصموص : شديد النحافة
مأنشح
رشم
تطريش

بعبعة : كلام لا معنى له
قفشة : خيبة
مزنوء : مضطر
سلال : يدعي البراءة
ردح : يتحدث دون انقطاع
تعفير : موسخ بالأتربة فهو معفر
قشة لفة : كله سوياً
ملبكة : مرتبكة
مكنكن : يجلس في حفرة أو أنه مرتاح في مكانه
رعديد : جبان
خربط : أخطأ
كومايات : كثيراً
مكركب : غير مرتب
محدوف : مرمي
اشلميش : نوع من الزبيب
منكوش : أشعث

مبعوج...مطعوج
محشوم...مستر
مزعبر...انو مكذب او غاشش
عفش...اثاث
شاطة ريالته..شطت ريالتو على سيرة اكلة يعني انو اشتهاها
مأنشح ...مو نظيف
رشم..يعني زت
تطريش..انو اذا حدى زت مي واجتك طرطوشة مي فبيعني طرشوو(فسر الماء بالماء حاسة حالي)
ردح ..وقت الوحدة تعصب ويفلت لسانها بيقولها عم ترددددددح

ازدل = استدل
تفركش = تعثر
مزبوط = صحيح
مروء = مبسوط ( على فكرة كلمة مبسوط بالعراقي يعني مضروب )
مصوفن = مو عرفان شو صاير حواليه
معصلج = معلق

اندبوري = منتوف : فقير
جلدة = كحتوت : بخيل
شطي مطي : بتلاقوا منها بالبزورية
قباقيب : مصنوع من الخشب
ستاتي : من الحلويات .. محشية جوز و مغطسة بالقطر ..
ما في خواص : لا فائدة ترجى
راقوب : من يراقب الناس و يتطفل عليهم
آشكرة : بشكل واضح
مكشر : تعابير وجهه تغيرت
كرع : أي شرب
اشتلق : انتبه
مطموز : منزعج أو حردان
يلطش : يأخذ الشيء من دون علم أصحابه
مشنك : يبتسم بطريقة يظهر فيها أسنانه
ملبع : تقال عندما يتسخ البللور
مبهبط = معبعب : تقال عندما تكون الملابس واسعة
بشكير : هي المنشفة
دحاحل : كرات صغيرة من البلور يلعب بها الصغار
تشرطو حناكو من المتاوبة : عند التثاؤب
دقر : القفل الخاص بالباب أو تقال للشخص بمعنى توقف
شباط اللباط : صفة لشهر شباط
محنشة : أي أنها شديدة السواد
معتة : مملة
تسترجي : تتجرأ
محنتر : حردان يرفض المضي قدماً
مشلوطة : محروقة بشكل خفيف
مفروطة : تضحك كثيراً
مخباط : كبيرة الحجم و قوية
متعمشق = متعربش : متمسك
ضبضبة : ترتيب
مبلضمة : كثيرة الحكي
محرقصة : مستعجلة
فشاية و فشاشي : بقعة و بقع
معمشة : في عيونها عمش
لمضة : حكيها زفر
مخصورة : كسمها حلو
مكسمة : حلوة
أوبة : مجموعة
فلان و علتان و علاك البان
البانة : نوع من العلكة أو المسكة
مفطرة : أي ملامح وجهها كبيرة
مشلبنة : ناعمة
سهيانة و سهتانة
مشفترة : شفايفها كبيرة
مفجوعة : لا تشبع
شالوحة : مو مرتبة
مروكبة : معصلجة
شاضومة : قوية و لسانها طويل
مصرومة : ترتدي ملابس ضيقة
ملحوش : مرمي
متأنة : تحب الإتقان
مأمبرة : لا يعجبها شيء
كشتبان : يستخدم للخياطة
مفعوس
مربوع : لا طويل و لا قصير
دنبكية : امرأة سمينة
شاطها تحت باطها : جوابها سريع
مقدقد : ناشف
نملية : لوضع الطعام فيها عند الانتهاء من الأكل
قاصعة : منحنية إلى الوراء

عالبيعة:ببلاش
كوشة:كمشة
مسبّحة: أكلة حمص
داكونة: ارنة مكنكنة
خرستانة:نملية:خزانة بالمطبخ.
نصية:سئيفة
نصاصي:هدوا البيوت وأت يكونو بين الدور والدور.
حئلة:حقل
بكاج:أفا السيارة المفتوحة.
غلأ: الي بيسكرو فيه المحلات.
كريجة:الي بيمشي فيه الولد الصغير أبل ما يتعلم المشي.
نونية: كمان للولاد
فصعون:بيبي
فرتوكة: صغير كتير
انسلأ بدنو: يعني خجل كتير
ضراب الصخن: هي مسبة أديمة
ايه منرجع للموضوع!
بيقولو: جديييييييييييييي
يعني انو واحد عم يكش..بيئومو بيقولو هيك ادامو مشان يسكت .!
انو حاجة كش يعني.

طجّونة: هي متل الطاسة.
جرن: هادا في منو بالحمام بيحطو فيه المي كانو وبيتحممو فيه
طشط أو طشت
آظان: سخان المي
كتلي وكتلك: صبلي وصبلك مي...الخ
كبجاية: بيسكبو فيها الشوربة.
نانرجة:وياسمينة:وكبادة: كلن اسماء شجرات بيطلعو بأرض ديار..وفي منن بيساووه معئود (مربى)
حاووظ: خزان مي .
غطيطة: ضباب
مربعانية: رياح بتجي بوقت من السنة
براس الحارة..(ظرف مكان)
بالسوكة...(ظرف مكان)
خيط مطو...والي بيطلع عليك بتحطو.. هي بالرحلات كان ويقولوها..متل هلأ وقت نقول..أمريكية.انو كل واحد بيدفع الي عليه.
كازية..
كٌزلك.نظارة
خبط لزء
سفئ طرئ
إيمعة..بوظة
أشاطي: جمع قشطة
أبابسطي..كلي وانبسطي
الأبابسطي أكلة بتصير من اليأطين..بس الكلي وانبسطي هي لازم يقولوها وقت يقولو اسم الطبخة.
دايمة الله يديما..والي حطا بيئيما..هي عالصفرة ومين لازم يقيمها بس يخلصو أكل

لبخة : لا تستطيع فعل شيء
انشلش ، انشلاشاً فهو مشلوش : أي أنه تفاجئ
تشردق : غص أثناء طعامه
ماكنة : قوية
مفنش : يقال عن الأنف مفنش أي أنه كبير و مبحبح
طاش حجره : لا يعرف ماذا يفعل
مأرّحة : قوية
حركشة : إثارة انتباه
خناقة : مشكلة
بهدلة : بعطرة كرامة الآخرين
مشرأب : متفاءل
عويصة : معقدة و صعبة الحل
قرد ملفلف : ملعون
ممعوس : مفعوس بشكل رهيب
بقجة : قطعة قماش يلف بها الثياب بدلاً من الحقيبة
طشمة : غبية أو بسيطة
مفعوص : صغير سناً أو قدراً
خرّيط : ارتعب
مكتكت : مهتري
فنطي : مشكلة
ينتع : يشيل و يحمل
مكمكرة : ملفوفة و تشعر بالدفء
دبلكة : فراطة أو على أهون سبب
تبلكم : ارتبك في الحديث
يبحلق : ينظر بإمعان
مشئرئة : فرحانة كتير
بئع هداك الصوت : صرخ بصوت عالي
يكررك : يصر في سؤاله أو طلبه
انتفض بدنه : انهز و زعل
نفضت الصوبة : خرج الدخان منها و الشحاوير
ضنضرمة : بوظة
مفنجر عيونو : فتحها على أخرها
هفتان : عايف حاله و تعبان
خرج ناشف : هدية على شكل نقدي
تدحكل : تفركش و وقع أرضاً
صوته عم يلعلع : عالي جداً
لبصة : تقال عن الطبخة متل اللبصة أي أنها شقفة واحدة

تنبل : كسول
مسفلئة : نحيفة
نكاية : جكارة
غنوجة : دلوعة
طفش : ذهب مع الريح
مشكولة : معلقة
ممعوط : متكرر أو موجود بكثرة
سنكوحة : نحيلة
معسفة : طويلة
يتشبرء : يصرف المال على كيفو
مكبتل : مدعبل يعني كوباتيل بالفرنسي
مروة : همة

يبصبص : ينظر خلسة
تقريق : سخرية على الآخرين
منتورة : تتصرف بانفعال و تقوم بحركات مالها طعمة
قملة مفروكة : تقال لمن يشعر بالقفشة و الخيبة
فطسان : منهك
معفشك و مفشكل : شي فايت ببعضه و مبهدل
مشحتفة : من هنا إلى هناك ليس لها مكان
ملاطشة : متل الذبابة عندما تلاطش و تتخبط من مكان لأخر
سرنوة : تصغير للقدر و الاحترام
شنططة : بهدلة و تعتير
يفلع : بنفجر
مصفرنة و مبعجرة : تشبيه بالليمونة أي أنها متعبة
مخ ترس : زي الجزمة القديمة .. عنيد
حجاب الخاصرة : تقال لمن يرافق واحد تاني على طول وين ما راح
زنخ و طفس و سمج : غليظ
طلطميس : لا يفهم شيئاً
فرتيلة و عرقيلة : وضع العقبات في وجه الآخرين
مأنبز : ظاهر للعيان
ما بيحب الزاحلة : يريد كل شيء على أصوله
سرسوبة : تقال لوصف الماء عندما ينزل كالخيط الرفيع من الحنفية أو الصنبور

ينمحق: يصطفل
شبعرفني: مابعرف
اتزهرم : عم اشرب السم
مجعوص: قاعد ومايل بقعدتو مو قاعد متل البشر يعني
اتسطح: اتمطرء
طئي هالتلفزيون: شعلي
سري مري: طول مالو قاعد: على طول رايح جاية
فائس: مابيطلع معو شي
اريضة: (شلون بدنا نفسرها هي؟؟) انو هففففففففف يعني
بايت: مو تازا
معّكر: مو رايق
مفتء: انو بيحكي حكي مافيك تجاوبو هليه او المفتء بدو قطب مخروم يعني
فارطة:تعبانة
فارطة متل الشاكرية:يعني بنت عم تضحك كتير وبلا طعمة
اشتلء: لاحظ

تم

بعتذر اذا كان في شي كلمة مو حلوة
بس الموضوع منقول

تحياتي

اكتشفت انو ما بنتمي للشام بالمرة Shocked

لك هالكلمات في منن بسمعن بس بدون مااعرف معناهن
بس ما فكرت انو هنن كلمات شامية عنجد يعني فكرت انو الناس عم تحكي كلام بلا طعمة او انو مخربطين بشي كلمة
مابعرف اغلبهن
مشكورة كتير جوجي

kossofina كتب:: اكتشفت انو ما بنتمي للشام بالمرة
لك هالكلمات في منن بسمعن بس بدون مااعرف معناهن
بس ما فكرت انو هنن كلمات شامية عنجد يعني فكرت انو الناس عم تحكي كلام بلا طعمة او انو مخربطين بشي كلمة
مابعرف اغلبهن
مشكورة كتير جوجي

:lol!: :lol!: :lol!: :lol!:
لك لا طولي بالك , شو مابتنتمي للشام Very Happy

هن صحيح الكلمات غريبة وانقرضت حاليا :lol!:
بس حلوين كتير
ثكرن ثكرن للوش :lol!:
نورتي حبيبتي

اي شو هل الإبداع والفن يا مجد ويا جوجو قواميس ما شاء الله عليكن حلوين كتير والله وانت يا ليلو شعورك نفس شعوري يعني وكأنو ما بننتمي لهل المنطقة شو هل الكلمات غريبين عجيبين
بتمنى تتقبل مروري مجد

bahaa كتب:: اي شو هل الإبداع والفن يا مجد ويا جوجو قواميس ما شاء الله عليكن حلوين كتير والله وانت يا ليلو شعورك نفس شعوري يعني وكأنو ما بننتمي لهل المنطقة شو هل الكلمات غريبين عجيبين
بتمنى تتقبل مروري مجد

شايف بالله يابهاء
كلمات كتير غريبة , بس انا بحب اسمعن كتير
بس كنت احضر باب الارة كنت كتير اضحك
كتير بحبن وبحب ئولون بس موحافظة منن كتير
تانكس بهاء نووورت
Wink

ههههههههههههههه والله عندكون نهفات انتو الشوام قاموس شامي - عربي 12851492981

انا حلبي فسط حلب هههههههههه
كمان هي نحن ما منحكيها
ان شاء الله بس خلص بكلوريا بدي احفظون واجي اعملكون زيارة بالشام يا ترى تستقبلوني ؟
بدي شوف الشلة كلها ان شاء الله قاموس شامي - عربي 668430

سامية اهلا وسهلا بتجي عبيتك ومطرحك
طبعا مستقبلك ولو
انت حضّار وبيحضر واجبك انشالله Very Happy

اي شو هاد

اسم الله عليكن

مو تاركين شي مو قايلينوا

يس كتير حلوين

» من أول عربي فاز بجائزة نوبل؟
» واحد عربي حربوق
» توقعات عربي بكالوريا علمي وأدبي 2011 الدورة الإضافية الإستثنائية الثانية (1)
» توقعات عربي بكالوريا علمي 2011 الدورة الإضافية الإستثنائية الثانية (2) هافالكو